ဒေါ်အောင်ဆန်းစုကြည်ကို နောက်ထပ် အဂတိလိုက်စားမှု၃ မှုနဲ့ တရားစွဲဖို့ စစ်ကောင်စီ ပြင်ဆင်နေ

နိုင်ငံတော်အတိုင်ပင်ခံ ဒေါ်အောင်ဆန်းစုကြည်ကို နောက်ထပ် အဂတိလိုက်စားမှု၃ မှုနဲ့ တရားစွဲနိုင်ဖို့ စစ်ကောင်စီဘက်က စုံစမ်း ပြင်ဆင်နေတယ်လို့ ဒေါ်အောင်ဆန်းစုကြည်ရဲ့ ရှေ့နေတွေကပြောပါတယ်။

တရားခွင်မှာ လက်ရှိ စစ်ဆေးခံနေရတဲ့ အဂတိမှုတွေမှာ စစ်ကောင်စီဘက်က တရားလိုပြသက်သေတွေရဲ့ ထွက်ဆိုချက်တွေဟာ အဓိပ္ပါယ်မရှိတဲ့ စွပ်စွဲချက်တွေဖြစ်တယ်လို့ ဒေါ်အောင်ဆန်းစုကြည်က တုံ့ပြန်ပါတယ်။ သူ့အမှုတွေကို သီတင်းတပတ်လုံး စစ်ဆေးနေတာကြောင့် ကျန်းမာရေးထိခိုက်တဲ့အတွက် နှစ်ပတ်တခါ စစ်ဆေးဖို့လည်း ဒေါ်အောင်ဆန်းစုကြည်က တရားရုံးကို လျှောက်ထားခဲ့ပါတယ်။ ရန်ကုန်ကလာတဲ့ ဒေါ်အောင်ဆန်းစုကြည်အမှုသတင်း အပြည့်အစုံကို နန်းလောင်ဝ်ပြောပြပါမယ်။

လက်ရှိ အဂတိလိုက်စားမှု ၅ မှုနဲ့ တရားစွဲခံထားရတဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ကို နောက်ထပ် အဂတိလိုက်စားမှု ၃ မှုတိုးဖို့ စစ်ကောင်စီဘက် က ပြင်ဆင်နေပါတယ်။ အမှုဖွင့် တရားစွဲနိုင်ဖို့ အဂတိလိုက်စားမှု တိုက်ဖျက်ရေးကော်မရှင်က စုံစမ်းနေတာမှာ ကနဦးစစ်ဆေး ချက်ယူဖို့ ဆင့်ခေါ်စာပို့ထားတယ်လို့ ဒေါ်အောင်ဆန်းစုကြည်ရဲ့ ရှေ့နေအဖွဲ့ထဲက တရားလွှတ်တော်ရှေ့နေကြီး ဦးခင်မောင်ဇော်က ဗွီအိုအေကို ပြောပါတယ်။

“အမှု စွဲဖို့ပေါ့။ ပထမ အဂတိက စုံစမ်းတယ်ဗျ။ အမှု မစွဲခင်မှာလေ၊ အမှု တခုတည်း မဟုတ်ဘူး၊ ၃ မှုဗျ။ ဆင့်စာ အဲဒီဘက်ကခေါ်တာဗျ။ ၃ မှုခေါ်တာဗျ။ ကျနော် တို့လည်းကောင်းကောင်းမသိဘူး။ သူကလည်းပဲ ရှေ့နေတွေ…ကျနော်တို့ကို မလွှတ်ဘူး၊ သူ့ကိုမေးချင်လာမေးလို့ ရတာပဲ။

သူဘယ်မှရှောင်လွှဲလို့ ရတာလည်းမဟုတ်ဘဲတဲ့- အဲလိုပြောပါတယ်။ ကိုယ်တိုင်ဖြစ်စေ၊ ကိုယ်စားလှယ်ဖြစ်စေ လွှတ်ရမယ် ပြောတာကို။ လေယာဉ်ပျံငှားပြီးတော့ အချိန်ပြည့် မစီးလို့ ဆိုတာပါတယ်။ လေယာဉ်ပျံငှားပြီးတော့ပေါ့။ တခုက အဲဒါပါတယ်။ တခုက ကျွန်းသစ်ဆိုလားမသိဘူးဗျ။ ကျွန်းသစ်တဲ့ ဗျ။ ကျနော် တို့ကြားလိုက်တာကိုပြောတာပါ။”

စစ်ကောင်စီရဲ့ အဂတိလိုက်စားမှုကော်မရှင်က စုံစမ်းနေတဲ့ အကြောင်းအချက် အသေးစိတ်ကို ဒေါ်အောင်ဆန်းစုကြည်ရဲ့ ရှေ့နေတွေ မသိရသေးပါဘူး။အိုအေက အဂတိလိုက်စားမှု တိုက်ဖျက်ရေး ကော်မရှင်ကို ဆက်သွယ်တာမှာလည်း ဖြေဆိုဖို့ငြင်းဆန်ပါတယ်။

လက်ရှိနေပြည်တော် သီးသန့်တရားရုံးမှာ အရင်စွဲဆိုထားတဲ့ အဂတိလိုက်စားမှု ၄ မှုကို စွဲချက်တင်သင့် မသင့် ကြားနာစစ်ဆေးမှုနေပါတယ်။ အဲဒီထဲက အမှု ၁ ခုအတွက် ပြီးခဲ့တဲ့ သောကြာနေ့ အောက်တိုဘာ ၁ ရက်က စစ်ကောင်စီရဲ့ တရားလိုပြသက်သေအနေနဲ့ ရန်ကုန်တိုင်းဝန်းကြီးချုပ် (ဟောင်း) ဦးဖြိုးမင်းသိန်းက လာရောက် ထွက်ဆိုခဲ့ပါတယ်။ ဒါနဲ့ပတ်သက်လို့ ဒေါ်အောင်ဆန်းစုကြည်က တုံ့ပြန်ချက်ကို ရှေ့နေ ဦးခင်မောင်ဇော်က ခုလိုပြောပါတယ်။

“ဟိုတပတ်ကထွက်ချက်နဲ့ ပတ်သက်လို့ ဘယ်လို ဘာပြောစရာရှိလဲ-လို့ ကျနော်တို့ မေးတယ် ဒါပဲ။ နာမည်ဘာညာ ဘာမှမပြောဘူး။ သူကလည်း နားလည်တယ်။ ‘ဟိုတပတ်က ထွက်ချက်နဲ့ ပတ်သတ်လို့ ဘယ်လိုဘာပြောစရာရှိလဲဆိုတော့ သူက ‘All absurd (အဓိပ္ပါယ်မရှိ မဟုတ်တမ်းတရားတွေ)’…လို့ အင်္ဂ လိပ်လိုပဲ ပြောတယ်။ အဲဒါပါပဲဗျ။”

ဦးဖြိုးမင်းသိန်းက အခေါက်ရွှေ (၇) ပိဿာ၊ အမေရိကန် ဒေါ်လာ (၆) သိန်းနဲ့ ရွှေဘုရားဆင်းတုတော် တဆူပေးခဲ့တယ်လို့ ထွက်ဆိုခဲ့တာဖြစ်ပါတယ်။
ဒေါ်အောင်ဆန်းစုကြည်ကို အပတ်စဉ် စစ်ဆေးနေကျ အမှု ၃ မှုနဲ့ သမ္မတ ဦးဝင်းမြင့် ၁ မှုတို့အတွက် ဒီကနေ့ အောက်တိုဘာ (၄) ရက်မှာ ရုံးထုတ်စဉ် ရှေ့နေတွေနဲ့ နာရီဝက်လောက် တွေ့ဆုံပြောခွင့် ရခဲ့တာပါ။

ဒီကနေ့ ရုံးချိန်းမှာတော့ ပို့ကုန်သွင်းကုန်ဥပဒေ၊ ဆက်သွယ်ရေးဥပဒေနဲ့ သဘာဝဘေးဥပဒေတို့အတွက် ရုံးထုတ်စစ်ဆေးခဲ့ပြီး သဘာဝဘေး ဥပဒေ ပုဒ်မ (၂၅) အတွက် လာမယ့် အပတ် အောက်တိုဘာ ၁၁ ရက်နေ့ ရုံးချိန်း ကျမှသာ စွဲချက်တင်သင့် မတင်သင့်ဆုံးဖြတ်ဖို့ တရားရုံးက အမိန့်ချလိုက်ပါ တယ်။ ပို့ကုန်သွင်းကုန် ဥပဒေနဲ့ ပတ်သတ်လို့ တဘက်ရှေ့နေတွေဘက်က တင်ပြထားတဲ့ နောက်တိုး သက်သေ စစ်ဆေးခွင့်ကို ဒေါ်အောင်ဆန်းစုကြည်ရှေ့နေတွေက ကန့်ကွက်ခဲ့ပေမယ့် တရားရုံးက လက်မခံတာကြောင့် လာမယ့်ရုံးချိန်းမှာ နောက်တိုး သက်သေ ထပ်မံစစ်ဆေးမယ်လို့ ရှေ့နေဦးခင်မောင်ဇော်က ပြောပါတယ်။

ဆက်သွယ်ရေးဥပဒေနဲ့ပတ်သတ်လို့တော့ ဒီကနေ့မှာ စွဲချက် တင်သင့် မသင့်ကို ၂ ဘက်ရှေ့နေတွေက လျှောက်လဲချက်ပေးကြရတယ်လို့ အဲဒီအမှုကို လိုက်ပေးနေတဲ့ ဒေါ်အောင်ဆန်းစုကြည်ရဲ့ ရှေ့နေကြီးဦးကြည်ဝင်းက ဗွီအိုအေကိုပြောပါတယ်။ ဒေါ်အောင်ဆန်းစုကြည်အနေနဲ့ သူမကျူးလွန်တဲ့ ပြစ်မှုတခုကို မကျူးလွန်ကြောင်းတင်ပြနိုင်ခဲ့သလို အမှုစွဲဆိုတာမှာလည်း လွဲမှားစွာ အမှုတပ် တရားစွဲခံခဲ့ရတယ်လို့ ဦးကြည်ဝင်းက ဗွီအိုအေကိုပြောပါတယ်။

“ဆက်သွယ်ရေး ဥပဒေဆိုတာ ရေဒီယို၊ အခုလို ကြိုးမဲ့ မိုဘိုင်းဖုန်းတွေနဲ့ မဆိုင်ဘူး။ FM တွေ၊ အသံလွှင့် telecommunication တွေ အသံလွှင့်ရုံတွေထူထောင် တာ။ လိုင်စင်ဆိုတာက ခုနက မြေတွေဝယ်ရဦးမယ်၊ ပုဒ်မတွေ အများကြီးပဲ။ ဒီတရားစွဲတာက အသံလွှင့်ရုံတွေနဲ့ပတ်သတ်တာကို စွဲရတာ။ စကားပြောစက်တွေနဲ့ မဆိုင်ဘူး။ ဒါကမှားစွဲတာ။ ပုဒ်မ ၆၇ နဲ့ မငြိဘူး။ ဘာကြောင့်လဲဆို ဒါက အသံလွှင့်ရုံတွေကို လိုင်စင်ပေးတာမို့။

နောက်ဒီစကားပြောစက်တွေက ဒေါ်စုဆီက မိတာမဟုတ်ဘူး။ စကားပြောစက်တွေက ဝန်ထမ်းတွေကမိတယ်ဆိုတာ ရှာဖွေ ပုံစံမှာကိုကပေါ်နေတာ။ သူတို့ ပြောတော့ ဝန်ထမ်းတွေဆီက သိမ်းတာမဟုတ်ဘူး။ ဒေါ်အောင်ဆန်းစုကြည် အိမ်ကလို ဟိုလိုလို ဒီလိုလို လုပ်ကြတာ။ ဒါမယ့် ရှာဖွေပုံစံမှာကိုက လုံခြုံရေးဝန်ထမ်းတွေဆီက သိမ်းဆည်းသည်ဆိုတာ ပါတယ်။ ဒါကြောင့် လျှောက်လဲချက်ပေးတော့ ဒီအမှုက မှားယွင်းမှုပါလို့ ပြောတာပါ။”

လောလောဆယ် စုစုပေါင်း အမှု ၁၁ ခုနဲ့တရားစွဲခံထားရတဲ့ ဒေါ်အောင်ဆန်းစုကြ ည် ကို အမှု ၁၀ ခုအတွက် သီတင်းပတ်တိုင်း နေပြည်တော် သီးသန့်တရားရုံးမှာ ရုံးထုတ် ကြားနာစစ်ဆေးမှုတွေ လုပ်နေပါတယ်။ နေ့စဉ်တရားရုံးလာနေရတာ သူ့ ကျန်းမာရေးထိခိုက်တဲ့အတွက် အပတ်စဉ်အစား သီတင်း ၂ ပတ်ခြား စစ်ပေးဖို့ ဒေါ်အောင်ဆန်းစုကြည်က ဒီနေ့ တရားရုံးကို စာတင်တောင်းဆိုခဲ့ပါတယ်။

လက်ရှိဒေါ်အောင်ဆန်းစုကြည် ရင်ဆိုင်ဆဲ အမှု ၁၁ မှုရှိနေပါတယ်။ ပို့ကုန်သွင်း ကုန် ဥပဒေ၊ ဆက်သွယ်ရေးဥပဒေ၊ သဘာဝ ဘေးဥပဒေနဲ့ (၂) မှုအပါအဝင် ပုဒ်မ ၅၀၅ (ခ) အမှုတွေအတွက်ကို တနင်္လာနဲ့ အင်္ဂါနေ့တိုင်း စစ်ဆေးနေပြီး နိုင်ငံတော် လျှို့ဝှက်ချက် အက်ဥပဒေ ၃ (၁)/ဂ နဲ့ အမှုကိုတော့ ကြာသပတေးနေ့တိုင်း စစ်ဆေးနေပါတယ်။ ဒါ့အပြင် အဂတိလိုက်စားမှု (၅) မှုထဲက (၄) မှုအတွက် သောကြာ နေ့တိုင်း နေပြည်တော်မှာ ကြားနာစစ်ဆေးနေပါတယ်။

Be the first to comment

Leave a comment

Your email address will not be published.


*